SIMBAH WONGSOSUKARTO

Punika dalemipun simbah kula, wonten dusun Ngagul-agulan Sendangrejo Minggir Sleman Ngayogyakarta. Asmanipun simbah Wongsosukarto, simbah kakung lan putri sampun sekeca wonten ing suwargi. Simbah Putri dipun pundhut Pangeran Dalem Gusti Yesus kala kula taksih alit, mbokmenawi kula SD, kinten-kinten taun 1983an. Simbah kakung pun pundhut Kanjeng Pangeran langkung dangu saking sedanipun simbah putri.

Kala kula taksih sekolah SMA Stella Duce I, dinten Setu bubar sekolah kula nglaju wangsul ndesa. Pinanggih kaliyan Simbah Putri, ingkang sampun ngenteni wayah kesayangan... lha.. nggih pancen kula punika wayah kesayanganipun Simbah Putri. Kala semanten, kula dipun paringi beras sakarung goni, gori mateng ingkang sampun dados nangka-eca sanget lan manis- ugi tempe bacem utawi tahu, sedaya kedah kula beta wonten ing griya kutha.

CATHETAN

Aku nyoba nulis nganggo basa jawa, dudu basa krama inggil, nanging campur ngoko lan basa 'gaul' cah Jogja. Gara-garane sedulurku-aku yen ngundang Gendut-amarga pas cilik gendut banget... jarene lho, wong aku yo durung lair pas cilike- maca blogku njur usul kenapa ora nganggo basa jawa wae.. Walah... nanging aku yo mikir, why not?

Aku arep nyoba nulis cathetan harian (taela... lah.. nek iki basa jawane apa ya) Yen 'My Day' basa jawane kira-kira 'Dinaku' (le maca: dinoku) utawa mengko tak wenehi judul 'Sambat', maksude mengeluh nek basa Indonesiane tapi kok wong urip sambat terus ya...utawa 'Uneg-uneg'.. mungkin iki sing rada pas...Tetembungan...marga isine warna-warna.

Nggih, dipun waos kemawon mbok menawi wonten kalepatan anggenipun kawula nulis, kawula nyuwun gunging pangaksama. Nuwun